Takimi Stefanoviq - Kuper pa rezultat për dialogun

Takimi i përfaqësuesit të BE-së në bisedime, Robert Kuper, me shefin e delegacionit serb, Borislav Stefanoviq, nuk ka shënuar ndonjë rezultat, i cili do të siguronte vazhdimin e dialogut. Për më tepër, në këtë takim Stefanoviq vetëm sa e ka ripërsëritur qëndrimin e tij të njohur, duke paraqitur disa propozime të modeleve për përfaqësimin rajonal të Kosovës, por gjithnjë me Rezolutën 1244 të KS të OKB-së. Kuper dhe Stefanoviq, përveç problemit të përfaqësimit rajonal, kanë diskutuar edhe për zbatimin e marrëveshjeve të arritura në dialogun ndërmjet Beogradit dhe Prishtinës, bën të ditur në një deklaratë Qeveria e Serbisë. Gjatë bisedës është vlerësuar se zbatimi i marrëveshjeve të arritura në dialog është duke u zhvilluar me një ritëm të mirë dhe se është e nevojshme që të dyja palët të bëjnë më shumë përpjekje që të gjitha marrëveshjet e arritura të zbatohen në tërësi. Kuper gjatë ditës së enjte do të qëndrojë edhe në Kosovë.