Berisha e Meta pjesëmarrës në Samitin e Sarajevës

Tiranë- Shqipëria do të përfaqësohet nga kryeministri Sali Berisha dhe ministri i Punëve të Jashtme, Ilir Meta në Samitin e Sarajevës, që do të mbahet në 2 qershor, në Bosnjë e Hercegovinë. Në përbërje të delegacionit shqiptar, që shkon në këtë Samit për të marrë një shenjë pozitive për liberalizimin e vizave, mësohet që do të jenë edhe ambasadori shqiptar në Sarajevë, Flamur Gashi, drejtoresha e Drejtorisë së BE-së në Ministrinë e Jashtme, Ilda Zhulali si dhe shefi i kabinetit të ministrit të Jashtëm, Sokol Dervishaj. Samiti i Sarajevës ka si qëllim mbledhjen e të gjithë aktorëve të rajonit, shteteve të BE-së, por edhe të Ballkanit dhe më gjerë se kaq. Shqipëria dhe Bosnja, presin që në këtë Samit të marrin lajmin e mirë për liberalizimin e vizave. E përveç kësaj, ky takim me rëndësi pritet të mos sjellë asgjë konkrete për sa i përket anëtarësimit të Ballkanit Perëndimor në Bashkimin Evropian.