Berisha: Vendi, jo në krizë

Kryeministri Sali Berisha hodhi poshtë deklarimet e kryesocialistit Rama se vendi është në krizë ekonomike. Kryeministri ishte në Fier për përurimin e rrugës Hoxharë-Darëzezë, 9.5 km. Sipas tij, opozita ka mani të mohojë realitetin, sepse në këtë mënyrë përfytyron se mund të vijë në pushtet. “Le t’i pyesin ata atëherë, me krizë po rriten rrogat dhe si mund të rriten rrogat dhe pensionet me krizë? Në krizë po asfaltohen rrugët?! Vetëm gjatë kësaj vere dhe vetëm rrugë që zbresin drejt detit janë asfaltuar dhe inauguruar rreth 100 kilometra rrugë. Ju që flisni për krizën dua t’ju pyes këtu? Me krizë rriten 60% eksportet e vendit, eksporti është prodhim më shumë se çdo gjë tjetër, eksporti është prodhim bujqësor, eksporti është tekstil, është këpucë, është makineri, është minerale dhe këto janë prodhime dhe në rast se vendi është në krizë me çfarë mekanizmi do të rriteshin ato rreth 60% më shumë se në çdo vend tjetër të Evropës. Ky vend të cilin ata e shpallin në krizë, klasifikohet nga bota si vendi i 57-të ku jetohet më mire”, tha Berisha. Kryeministri përshëndeti edhe liberalizimin e pritshëm të vizave me vendet e Bashkimit Evropian, duke e cilësuar këtë stinë, si një vjeshtë të madhe. “Ne ia dolëm bashkërisht, të plotësojmë një nga një kushtet dhe të meritojmë plotësisht që gjatë muajve që vijnë të  lëvizim të lirë në mbarë Evropën njëlloj si qytetarët e saj”, u shpreh Berisha.