Haxhinasto kërkon nga Libia ta njohë Kosovën

Zëvendëskryeministri dhe ministri i Punëve të Jashtme të Shqipërisë, Edmond Haxhinasto ka vazhduar edhe sot vizitën në Tripoli me ftesë të homologut të Libisë, Ashour Bin Khayal. Gjatë takimit me Khayal, Haxhinasto ka shprehur mbështetjen e Shqipërisë ndaj tranzicionit të popullit libian, duke garantuar se Shqipëria është e gatshme të asistojë Libinë në periudhën e tranzicionit nga diktatura në demokraci.´ “Eksperienca shqiptare e tranzicionit nga diktatura në demokraci, mund të jetë e vlefshme për Libinë dhe ne jemi gati që të ofrojmë këtë eksperiencë nëse nevojitet, për ngritjen dhe forcimin e institucioneve të Libisë”, tha Haxhinasto. Diplomati shqiptar ka theksuar se me vizitën e tij në Libi hapet një faqe e re në marrëdhëniet mes dy vendeve, ndërsa ka kërkuar gjithashtu edhe njohjen e Kosovës nga Libia. Nga ana a tij, ministri i Jashtëm i Libisë, Ashour Bin Khayal vlerësoi bashkëpunimin e deritanishëm dhe nënvizoi se është e nevojshme që të rikonsiderohen dhe rivlerësohen ato në kuadër të ndryshimeve që kanë ndodhur në Libi.