description

Jahjaga e Thaçi më 21 shtator në SHBA, për ceremoninë e NAAC-it

Publikuar: E marte 28 Gusht 2012, 11:49 0 Komente

Presidentja e Kosovës Atifete Jahjaga, kryeministri Hashim Thaçi si dhe gjashtë ministra të kabinetit qeveritar më 21 shtator pritet që të vizitojnë SHBA-në, ku do të marrin pjesë në ceremoninë vjetore të ndarjes së çmimeve të Këshillit Kombëtar Shqiptaro-Amerikan (NAAC). Kjo është konfirmuar nga një deklaratë e lëshuar nga NAAC, ku është bërë e ditur se ceremonia pritet që të zhvillohet në Gotham Hall në Nju Jork.
Sipas njoftimit, pjesëmarrjen e kanë konfirmuar edhe presidentja Jahjaga, kryeministri Thaçi, si dhe gjashtë anëtarët e kabinetit të tij: zëvendëskryeministri i parë, Behgjet Pacolli, ministri i Jashtëm, Enver Hoxhaj, ministrja e Integrimeve Evropiane, Vlora Çitaku, zëvendëskryeministrja Mimoza Kusari-Lila, ministri i Infrastrukturës, Fehmi Mujota, si dhe ministri i FSK-së, Agim Çeku.
Kurse nga Shqipëria, përveç presidentit Bujar Nishani, të konfirmuar për pjesëmarrje në këtë ceremoni janë edhe dy ambasadorët që punojnë në SHBA – ambasadori i Shqipërisë në SHBA, Gilbert Galanxhi, dhe ambasadori i Shqipërisë në OKB, Ferid Hoxha. Nga Maqedonia do të marrin pjesë dy zëvendëskryeministra shqiptarë të Qeverisë në Shkup, Teuta Arifi dhe Musa Xhaferri.
Ceremonia vjetore e çmimeve të Këshillit Kombëtar Shqiptaro-Amerikan mbahet çdo vit, ndërsa sipas organizatorit çmimet nderojnë liderët e dalluar nga Ballkani dhe mbarë bota.
Vitin e kaluar, çmimi “Hands of Hope” i është dhënë ish-kryeministrit britanik, Toni Bler, ndërsa ishte nderuar edhe ambasadori i ndjerë amerikan, Riçard Holbruk. Sipas formës së regjistrimit, çmimi për një person që do të marrë pjesë në ceremoni është 350 dollarë, që siguron vetëm hyrjen dhe vendin në një prej tavolinave të thjeshta për darkë, deri në 1000 dollarë, që siguron vendin në njërën prej tavolinave kryesore të darkës, biletën për VIP, si dhe fotografimin me laureatët e çmimeve. NAAC është organizatë jofitimprurëse e dedikuar për avokim për shqiptarët dhe promovim të paqes dhe zhvillimit ekonomik në Ballkan, duke nxitur politikat demokratike, promovuar respektimin për të drejtat e njeriut, dhe duke zbatuar programe edukative dhe zhvillimore. NAAC përgjithësisht është konsideruar gjatë viteve si zëri i shqiptarëve në Uashington./kosovasot/

Printo Dërgo
  • di

Komente


arkivi i lajmeve