Kosova evropiane, faktor stabiliteti për rajonin

Shefi i diplomacisë shqiptare, Ilir Meta, gjatë takimit në Berlin me homologun e tij gjerman Guido Vestervelle, theksoi se pjesëmarrja e Kosovës në Takimin e Sarajevës ishte një hap përpara në integrimin e rajonit. Me këtë rast Meta ka nënvizuar rëndësinë e përfshirjes së Kosovës në të gjitha iniciativat integruese, “pasi Shqipëria mbështet në radhë të parë një Kosovë evropiane, si faktor stabiliteti për të gjithë rajonin”. Gjatë këtij takimi që u zhvillua të mërkurën në Berlin u vlerësua bashkëpunimi shumë i mirë politik dhe ekonomik dypalësh dhe u shpreh vullneti i përbashkët për forcimin e mëtejshëm të tij, përmes investimeve gjermane në Shqipëri, veçanërisht në sektorin e energjisë, duke nxitur bizneset e vogla e të mesme. Gjithashtu, u vlerësua bashkëpunimi dypalësh mes strukturave përgjegjëse në luftën kundër krimit të organizuar.