Kryeministri Berisha takon Edita Tahirin

Zëvendëskryeministrja e Kosovës, Edita Tahiri, ka qëndruar për vizitë zyrtare në Shqipëri, ku edhe është pritur nga kryeministri Sali Berisha. Në takim mësohet të jetë biseduar për forcimin e bashkëpunimit mes Kosovës dhe Shqipërisë, për situatën e përgjithshme në të dyja vendet dhe në rajon, si dhe për rrjedhat e dialogut të Brukselit. Me këtë rast, Tahiri ka theksuar "përkushtimin e dëshmuar të shtetit të Kosovës për rezultatet e dialogut, në harmoni me Kushtetutën e Kosovës". Nga ana tjetër, Berisha "ka vlerësuar lart angazhimin konstruktiv të Kosovës në dialogun teknik dhe ka shprehur përkrahje të plotë për qëndrimet e Qeverisë së Kosovës". Të dy bashkëbiseduesit ndanë të njëjtin mendim se strukturat paralele në veri të Kosovës dhe mosrespektimi i marrëveshjeve nga pala serbe përbëjnë një nga problemet më serioze midis Kosovës e Serbisë, sikundër theksuan se Shqipëria dh Kosova besojnë se respektimi kufijve aktualë të jugut të Ballkanit është interesi më i mirë i të gjitha vendeve dhe kombeve të rajonit. Berisha dhe Tahiri janë pajtuar se integrimi sa më shpejtë i rajonit në BE dhe në NATO është në interes të të gjitha vendeve dhe një kusht themelor për paqen dhe stabilitetin e qëndrueshëm në rajon.