Topi nuk rikandidon për president të Shqipërisë

Presidenti i Republikës së Shqipërisë, Bamir Topi, të enjten në një pritje që kishte organizuar për fund vit për përfaqësuesit e medieve, deklaroi se ky do të jetë edhe komunikimi i tij i fundit si president, duke paralajmëruar kështu që nuk do rikandidojë më për këtë post. “Ky është komunikimi i fundit me ju si president, nuk do jem më në këtë pozicion institucional”, tha Topi, dhe jetën politike të këtij viti e ka cilësuar si mjaft dinamike, ndërsa falënderoi mediet për misionin e tyre të vyer. Duke vlerësuar medien, Topi tha se ajo në momente të caktuara ka bërë edhe revolucione. Ai apeloi që në vend të ketë medie të pavarura, ku të mbizotërojë “e vërteta dhe profesionalizimi”. Ditë më parë kryeministri i Shqipërisë dhe kryetari Partisë Demokratike, Sali Berisha ka njoftuar se PD-ja nuk do ta kandidojë Bamir Topin për president.