Vokrri kërkon një prokuror vetëm për futboll

Kryetari i Federatës së Futbollit të Kosovës (FFK), Fadil Vokrri, kërkon angazhimin e një prokurori që do të merrej vetëm me parregullsitë në futboll, ka njoftuar FFK-ja të martën mbrëma pas mbledhjes së mbajtur të Komitetit Ekzekutiv të kësaj organizate.

Sipas njoftimit, Vokrri ka njoftuar anëtarët e KE-së se së shpejti pritet të mbajë një takim me prokurorin e shtetit, të cilit do t'ia shtrojë kërkesën për angazhimin e një prokurori vetëm për futbollin.

FFK-ja dëshiron që me këtë veprim të luftojë më ashpër dukuritë negative, në veçanti trukimin e ndeshjeve dhe vandalizmin.

"Presidenti i FFK-së, z. Fadil Vokrri, do të mbajë një takim me prokurorin e shtetit, nga i cili do të kërkojë që të angazhojë një prokuror, i cili do të kishte prioritet lëndët e çfarëdo lloj dukurie e parregullsie negative që dëmtojnë futbollin e Kosovës", thuhet ndër të tjera në njoftimin e FFK-së.

(Kosova Sot)