Short i vështirë për Partizanin, Laçin, me fat Luftëtari

Short shumë i vështirë për Partizanin dhe Laçin në turin e parë kualifikues të Europa League.

Një duel akoma më të vështirë do të ketë skuadra tjetër shqiptare që luan në kampionatin maqedonas KF Shkupi që do të sfidojë gjigandët skocezë të Glasgow Rangers.

Pafat Partizani që kapi kundërshtarin më të vështirë të grupit të tij teksa do të përballet me Mariborin, skuadrën që ka dominuar futbollin slloven në dekadën e fundit me përjashtim të sezonit të fundit që u rendit në vendin e 2-të dhe që ka në përbërje mesfushorin e kombëtares kuqezi Valon Ahmedi.

Ditën e djeshme Maribori mposhti 4-0 në miqësore Kukësin duke treguar se është shumë më lartë përsa i përket nivelit krahasuar me skuadrat shqiptare, kështu që shanset e Partizanit që i ka nisur edhe përgatitjet me vonesë për të kaluar më tej janë pothuajse zero. Short i vështirë edhe për Laçin që do të ketë përballë një skuadër qipriote pikërisht Anorthosis Famagustën, ish skuadrën e ish portierit të kombëtares shqiptare Arjan Beqaj.

Për Laçin parashikohej një short i vështirë pasi kundërshtarët e mundshëm ishin të gjithë shumë të fortë për kurbinasit. Antorthosis është një skuadër me shumë më tepër eksperiencë në arenën europiane dhe kualifikimi për Laçin do të jetë një mision shumë i vështirë.

Me fat Luftëtari që edhe pse bënte pjesë ne vazon e skuadrave jo favorite ka shanse të kalojë raundin e parë në debutimin e saj në kompeticionet europiane. Bluzinjtë do të kenë përballë skuadrën letoneze të Ventspils, një ekip deri diku i fortë por i pranueshëm dhe nëse do të ketë edhe fatin në krah Luftëtari mund ta kalojë këtë raund.

Partizani do ta luajë ndeshjen e parë në shtëpi pikërisht në stadiumin Selman Stërmasi në datën 12 korrik ndërkohë që të gjitha skuadrat e para shqiptare ndeshjet e para do t’i luajnë në transfertë ndërsa ato të kthimit një javë më pas në shtëpi.

 

 

(Kosova Sot)