Panucci afër shkarkimit, Duka kontakton legjendën e futbollit shqiptar për pozitën e trajnerit

Humbja 0-1 ndaj Skocisë ka tronditur themelet e kombëtares shqiptare dhe duket se trajneri italian, Christian Panucci e ka mbyllur aventurën e tij në stolin kuqezi.

Pritet vetëm vendimi zyrtar, por largimi duket i pashmangshëm.

Nga ana tjetër FSHF po mendon që në vendin e tij, të vërë një trajner shqiptar dhe sipas “Panorama Sport”, drejtuesit e Federatës kanë kontaktuar me legjendën Bledar Kola.

Ish-mesfushori i kombëtares që aktualisht ka rolin e zv.trajnerit të AEK-ut në Greqi, shihet si kandidati kryesor për të marrë drejtimin e skuadrës.

Ai ka punuar prej vitesh në kampionatin grek, madje atje shkoi që në vitin 2002, një vit pasi u largua nga Kombëtarja shqiptare.

Kola ka një karrierë të pasur si trajner në Greqi, por edhe si zv.trajner. Kujtojmë që në kombëtare, Kola ka luajtur në vitet 1990-2001, duke shënuar 6 gola në 40 takime.

 

(Kosova Sot)