Grabitje e armatosur në qendër të Mitrovicës

Policia e Kosovës i ka filluar hetimet lidhur me rastin e regjistruar si grabitje e armatosur, të raportuar të ketë ndodhur mbrëmë, rreth orës 21:00, në rrugën “Mbretëresha Teutë”, përkatësisht në një lokal të kompanisë IPKO - “Trionet”, në afërsi të stacionit të autobusëve në Mitrovicë. Sipas informatës policore, dy persona të dyshuar, të panjohur dhe të armatosur, duke vënë nën kërcënim të drejtpërdrejtë viktimën e tyre, një person 24-vjeçar, punonjës në lokal, kanë marrë para të gatshme në vlerë prej 305 euro. Veç kanosjes së drejtpërdrejtë me armë, nuk është raportuar për vënie në përdorim të armës apo sulm fizik ndaj viktimës së këtij rasti. Pas grabitjes, të dyshuarit janë larguar nga vendi i ngjarjes. Njësitë policore të stacionit jugu, nën përkrahje të hetuesve rajonalë të sektorit për krime serioze, kanë filluar hetimet e menjëhershme të rastit, me qëllim të identifikimit të kryesve të këtij akti kriminal.