Brenda 48 orëve, arrestohen 9 persona të kërkuar

Publikuar: E mërkure 28 Korrik 2010, 20:00 1 Komente 5 Rekomandime

Prishtinë, 28 korrik

Në bazë të urdhëresave paraprake nga gjykata, njësite të Policisë së Kosovës në Drejtorinë Rajonale të Prishtinës kanë arrestuar 9 persona të kërkuar, përfshirë këtu edhe një të kërkuar për vrasje. Lajmi është bërë i ditur nga Policia e Kosovës të cilët kanë njoftuar se Policia e Kosovës, më konkretisht Drejtoria Rajonale e Prishtinës, vetëm gjatë këtij 48 orësh ka bërë realizimin e nëntë urdhëresave të gjykatës, me ç’rast ka arrestuar nëntë persona të dyshuar, persona këta që dyshohet se kanë kryer vepra të ndryshme penale në periudha të ndryshme kohore. Më 26 korrik 2010 Policia e Kosovës duke zbatuar urdhëresën e Gjykatës Komunale në Prishtinë ka bërë arrestimin e personit të kërkuar Idriz. Z., person ky i kërkuar për veprën penale të vrasjes. Po në të njëjtën ditë është realizuar urdhëresa e gjykatës për personin e kërkuar për veprën penale të vjedhjes së rëndë si dhe një urdhëresë tjetër për shkaktim të rrezikut të përgjithshëm. Më 27 korrik 2010 po ky njësit e ka bërë realizimin e 6 urdhëresave të gjykatës kështu duke arrestuar 6 persona të shpallur në kërkim për veprat penale të mashtrimit, shpërdorim të detyrës zyrtare dhe rrezikim i trafikut publik. Drejtoria Rajonale e Prishtinës gjatë vitit 2009 ka realizuar 10990 urdhëresa nga të gjitha nivelet e gjykatave, ndërsa në gjashtëmujorin e parë të vitit 2010 janë realizuar 9637 urdhëresa.