Digjen dy shtëpi të pabanuara në Cërnicë

Gjilan, 1 shkurt

Dy shtëpi të pabanuara në fshatin Cërnicë, komuna e Gjilanit, janë djegur nga zjarri, derisa njësitet e hetimeve rajonale janë duke punuar në zbardhjen e rrethanave. Ismet Hashani, zëdhënës rajonal i PK-së në Gjilan, ka thënë se nga hetimet e para mësohet se shtëpitë ishin tё pabanuara qё nga paslufta e këndej, pa dyer e dritare dhe pa orendi. Pronarët ndodhen jashtë vendit dhe nuk banojnë nё këtë fshat me vite. Hashani ka thënë se deri mё tani nuk dihen shkaqet e shpërthimit tё zjarrit, por prokurori i qarkut ka urdhëruar policinë që të merret me hetimin e rastit. Ndërkaq, mediet lokale serbe kanë njoftuar për këtë rast, duke nënvizuar se bëhet fjalë për shtëpitë e Lubisha Spasiq e Stanko Stanojeviq, të cilët së bashku me familjet e tyre ndodhen me punë të përkohshme në Zvicër. Sipas këtyre medieve, të cilat i referohen qytetarit Srgjan Menkoviq nga ky fshat, shtëpitë janë plaçkitur më parë dhe pastaj u është vënë zjarri. Ai ka thënë se nga shtëpitë është marrë gjithçka që ka qenë e mundur, ndërkaq policia nuk e konfirmon këtë.