Disa turistë dhe banorë kanë mbetur të bllokuar në Rugovë

Edhe pse reshjet e borës në komunën e Pejës janë ndalur, ende ka banorë që vazhdojnë të jenë të bllokuar. Sasia e madhe e borës dhe ortekët e pandërprerë që po bien në Grykën e Rugovës kanë bërë që rruga për në Rugovë të jetë e mbyllur, duke izoluar afro 250 banorë dhe turistë. Po ashtu, fshati Dushkajë i komunës së Pejës është plotësisht i bllokuar. Avdyl Lajçi, drejtor për shpëtim dhe emergjencë në komunën e Pejës, ka thënë të mërkurën se, pas pushimit të reshurave, gjendja ka nisur të normalizohet në rrugët e qytetit dhe në ato të zonave rurale."Ne sot jemi duke bërë përpjekje që të hapim rrugën për në Rugovë dhe atë për në fshatin Dushkajë. Këto dy zona tani për tani i kemi të bllokuara. Kompania regjionale që e ka pasur për obligim të hapë rrugën Pejë-Kuqishtë nuk po arrin ta bëjë një gjë të tillë, andaj e kemi angazhuar edhe një kompani shtesë. Lajçi ka thënë se, sipas vlerësimeve të para, janë evidentuar dëme të shumta materiale, të cilat arrijnë vlerën mbi 1 milion euro.