Dy të arrestuar, konfiskohen rreth 19 kg marihuanë

Drejtoria për Hetimin e Trafikimit me Narkotik – Njësia rajonale në Mitrovicë, në vazhdën e luftës kundër kriminalitetit të organizuar dhe krimeve të tjera, pas hetimeve njëjavore, në bashkëpunim me njësitë e tjera përkatëse, të enjten ka zhvilluar dy bastisje në rajonin e Mitrovicës. Si rezultat i këtij operacioni policor janë arrestuar dy persona të dyshuar për dyshimin e bazuar se të njëjtit kanë kryer veprën penale “blerje, posedim, shpërndarje dhe shitje e paautorizuar e narkotikëve të rrezikshëm dhe substancave psikotropike”. Sipas zyrës së policisë rajonale në Mitrovicë të dyshuarit janë: Muhamet K. (1978) dhe Makfir S. (1966) shtetas të Kosovës. Gjatë bastisjes së njërës nga shtëpitë e personave të dyshuar janë gjetur dhe konfiskuar 20 paketime me substancë narkotike të llojit marihuanë dhe një pushkë 8.5 mm prodhim italian, ku sasia totale e marihuanës së konfiskuar arrin në 18 kg. e 627 g. Personave të dyshuar me autorizim të PPQ-së në Mitrovicë u është shqiptuar masa e ndalimit policor për 48 orë.