Eksploziv në kazino, s’ka të lënduar

Prizren, 27 janar

Mbrëmë rreth orës 17:45, në tualetin e kazinosë ”ACT Magic”, që ndodhet në ambientet e hotelit “Theranda” në qendër të Prizrenit, ka ndodhur një shpërthim i cili ka shkaktuar dëme materiale, por jo viktima në njerëz, njofton zëdhënësi i policisë Rajonale në Prizren, Hazir Berisha. Njësitet kompetente policore kanë kryer procedurat hetimore në vendin e ngjarjes. Sipas ekspertëve kundër eksplozivëve të policisë, lënda shpërthyese është aktivizuar me teledirigjim. Ende nuk dihet motivi i vendosjes së eksplozivit, por ekziston dyshimi se mund të ketë lidhje me konkurrencën. Pas shikimit të vendit të ngjarjes janë analizuar disa dëshmi që kanë çuar në arrestimin e një personi të dyshuar, i lindur më 1983. I dyshuari tanimë po mbahet në ambientet mbajtëse të policisë, ndërkaq provat materiale me shkresat e lëndës do t’i kalojnë prokurorisë për procedim të mëtejmë të rastit.