EULEX-i arreston një zyrtar të MAP-it

Departamenti i Policisë Ekzekutive të EULEX-it, të enjten në Prishtinë ka kryer bastisje në banesën private dhe zyrën e një administratori të teknologjisë informative (IT) në Qeverinë e Kosovës në lidhje me hetimin e Ministrisë së Transportit dhe Postë-Telekomunikacionit. Në një komunikatë të lëshuar nga EULEX-i, nuk bëhet i ditur emri i të arrestuarit, ndërsa njoftohet se hetimi është zhvilluar në lidhje me hetimin e Ministrisë së Transportit dhe Postë-Telekomunikacionit. “Bastisjet janë autorizuar nga gjykatësi i procedurës paraprake nga Gjykata e Qarkut të Prishtinës. I pandehuri është arrestuar dhe akuzohet për pengim në mbledhje të provave. Ai aktualisht gjendet në paraburgim policor të autorizuar nga Prokuroria Speciale e Kosovës (PSRK)”, thuhet në komunikatë. Ndërkohë, Ministria e Administratës Publike konfirmon lajmin se sot, nga policia e EULEX-it, është arrestuar Gani Zogaj, zyrtar i Departamentit të e-qeverisjes dhe proceseve administrative në Ministrinë e Administratës Publike. “MAP, ashtu si edhe Qeveria e Kosovës, angazhohet për sundimin e ligjit në vend, si dhe rikonfirmon gatishmërinë e saj që të bashkëpunojë me institucionet e drejtësisë”, thuhet në një komunikatë për media të kësaj ministrie.

Emri: Komenti: KARAKTERE TE MBETURA