Gjatë 24 orëve të fundit, 47 aksidente

Vazhdon gjendja e rëndë në shumë rajone të Kosovës, për shkak të borës dhe ngricave. Rrugët magjistrale dhe rajonale janë të kalueshme, ndërsa i pakalueshëm mbetet vetëm pikëkalimi në Kullë, në drejtim të Malit të Zi. Zëdhënësi i Policisë, togeri Brahim Sadria, bëri të ditur se në 24 orët e fundit janë shënuar 47 aksidente, gjashtë prej tyre me lëndime, ndërsa të tjerat me dëme materiale. Njoftohet se ekipet e pastrimit të borës e kanë zhbllokuar rrugën magjistrale Mitrovicë-Podujevë, duke përfshirë edhe fshatrat shqiptare të Leposaviqit dhe të Zveçanit. Zyrtarët komunalë të Mitrovicës thanë se do të jenë në gatishmëri për shkak të vazhdimit të reshjeve të borës. Behxhet Bala, drejtor për Mbrojtje dhe Shpëtim, tha se tashmë janë zhbllokuar të gjitha rrugët, duke përfshirë edhe fshatin Kaqandoll, që kishte mbetur i izoluar prej të shtunës. Bala theksoi se është duke u punuar që të pastrohen edhe rrugët lokale nëpër fshatra, në mënyrë që të krijohen kushte për qarkullim të lirë të qytetarëve.