Kapen të dyshuarit për grabitje

Autoritetet policore të Ferizajt kanë njoftuar se pas një pune të suksesshme operative, Njësitë e Hetimeve te Stacionit Policor në Shtime dhe të Hetimeve Rajonale të Ferizajt i kanë arrestuar: G.K., 22-vjeçar; E.M., 19-vjeçar dhe B.S., , të gjithë nga komuna e Shtimes, të dyshuar lidhur me disa raste të grabitjeve dhe vjedhjeve të rënda të ndodhura në Shtime. Zëdhënësi i PK-së për rajonin e Ferizajt, toger Agim Gashi, ka njoftuar se gjatë arrestimit, te i dyshuari G.K. është gjetur edhe një pistoletë e tipit “Fuh pistole, model 27” të kalibrit 7,65 mm me një karikator dhe gjashtë fishekë. “Gjatë intervistimit, të dyshuarit kanë pranuar se në bashkëveprim kanë kryer grabitjet në Postën e qytetit, në filialin e “Vestern Union”, vjedhjet e rënda të kryera në marketet “Penny”, “Nazi” dhe “Dardani”, kafiterinë Home PUB, të gjitha këto në Shtime. Me rastin e bastisjes, te të dyshuarit janë gjetur dhe konfiskuar si prova materiale 10 402 euro. Sipas deklaratave të të dyshuarve, gjësendet e vjedhura (stoli ari, artikuj të ndryshëm nga marketet) i kanë shitur kryesisht në Prizren”, ka thënë toger Gashi.