Konfiskohen cigare kontrabandë në vlerë 5 mijë euro

Mitrovicë, 1 shkurt 

Njësitë patrulluese të stacionit veri në Mitrovicë, janë alarmuar në kërkim dhe ndjekje të një automjeti “W Golf 4”, ngjyrë e kaltër, pa targa të regjistrimit, i cili paraprakisht nuk ishte ndaluar në një pikë kontrolli të vendosur nga Policia e Kosovës, në rrugën “Çeta e Minatorëve” në veri të Mitrovicës. Pak minuta më vonë, automjeti i dyshuar, është identifikuar dhe ndaluar nga njësitë patrulluese ndërsa ngasësi i automjetit, është identifikuar si një 32 vjeçar, i përkatësisë etnike shqiptare, i cili është vënë nën kontroll të Policisë së Kosovës, pa ndonjë incident. Gjatë kontrollit fizik, brenda në automjet, policia ka identifikuar; dhjetë (10) pako me nga pesëdhjetë (50) boksa cigare, për të cilat ngasësi nuk posedonte asnjë dokumentacion për prejardhjen dhe transportin e mallit të ngarkuar. Lidhur me këtë rast, stacioni policor veri në Mitrovicë, ka kërkuar asistencën e hetuesve rajonal kundër krimeve ekonomike dhe të zyrtarëve të doganave të Kosovës, për të sekuestruar mallin e dyshuar të Kontrabanduar. Malli i sekuestruar, besohet të arrijë vlerën e rreth 5000 (pesëmijë) euro. Automjeti i dyshuar së bashku me mallin e ngarkuar, janë deponuar në terminalin doganor të Mitrovicës, për regjistrim të rastit dhe inicim të procedurave hetimore.