Konfiskohet një automjet, dyshohet se është vjedhur

Mitrovicë, 27 janar

Policia njoftoi se në rrugën “Mbreti Petër”, zyrtarët policorë të stacionit veri në Mitrovicë ndaluan për kontroll një automjet, i cili dyshohet të jetë i vjedhur. Si rezultat i një pune të efektshme në kuadër të planit patrullues dhe parandalues në sektorë, njësia patrulluese e stacionit veri ka ndaluar për kontroll automjetin e tipit “Audi A-4” ngjyrë metalike, me targa të republikës së Serbisë “BG”, të cilin e drejtonte një 35 vjeçar, i përkatësisë etnike serbe, banor i Kosovës. Pas veprimeve të para hetimore në vend të ngjarjes, policët kanë vërtetuar se automjeti ishte me afat të skaduar të regjistrimit, ndërsa targat e vendosura në automjet i përkisnin një kohe më të vjetër të regjistrimit. Ngasësi i automjetit nuk posedonte asnjë autorizim për vozitjen e tij. Ngasësi i automjetit të dyshuar, së bashku me veturë, janë shoqëruar në stacionin policor për inicim të rastit, ndërsa hetuesit rajonalë të drejtorisë rajonale të Mitrovicë janë njoftuar për detajet e identifikuara. Prokurori publik i çështjes është informuar lidhur me rastin dhe veprimet e ndërmarra të policisë, ndërsa automjeti i dyshuar i vjedhur është sekuestruar nga policia deri në verifikim të plotë të dhënave origjinale të tij. Rasti është iniciuar si vepër penale me dyshim të “falsifikimit të dokumentacionit”, ndërsa hetuesit e sektorit të auto-krimeve janë duke ndjekur vazhdimin e procedurave hetimore.