Mbrojtja këmbëngul që prokurori Salustro të dëshmojë

Prishtinë-Ish-luftëtarë të UÇK-së, Arben Krasniqi, Naser Krasniqi, Nexhmi Krasniqi, Naser Shala, Sabit Shala, Shaban Shala, Refki Mazreku, Behlul e Fatmir Limaj, Besim Shurdhaj, edhe të martën kanë qëndruar në bankën e të akuzuarve nën akuzat e prokurorit italian Maurisio Salustro për krime të luftës kundër popullatës civile, në një seancë në të cilën është diskutuar në lidhje çështjen e këtij prokurori për t’u dëgjuar në cilësi të dëshmitarit. Janë dhënë arsye dhe detaje nga ana e mbrojtjes për dëgjimin e prokurorit në këtë cilësi, madje nuk ka munguar as prezantimi në mënyrë kronologjike për veprime gjatë procesit hetimor ku mbrojtja ka aluduar se ka qenë e anashkaluar. Nga ana tjetër, është përmendur edhe lista e dëshmitarëve e prezantuar gjatë seancës së kaluar prej nëntë dëshmitarëve, dy prej të cilëve pjesë e stafit lokal, ndërsa të tjerët të atij ndërkombëtar.

“Ne si mbrojtje kemi qenë të pafuqishëm që të pengojmë veprimet dhe nuk i kemi shikuar gjërat zi deri në rastin e vdekjes së “Dëshmitarit X”. Spekulimet i vërteton vdekja e dhunshme e “Dëshmitarit X ”, kanë thënë mbrojtësit e të akuzuarve, duke kërkuar që të dëgjohet në cilësi të dëshmitarit Maurisio Salustro për të rrëfyer rreth “Dëshmitarit X” që nga kontaktet e ditëve të para e deri me rastin e vdekjes. Seanca ku pritet të nxirret vendimi nëse do të dëgjohet prokurori Salustro në cilësi të dëshmitarit pritet të mërkurën.