Mbytet një qytetar i Kosovës në Durrës

Publikuar: E diel 29 Gusht 2010, 20:34 1 Komente 3 Rekomandime

Një shtetas i Kosovës është mbytur të dielën paradite në bregdetin e Durrësit. Bëhet e ditur se viktima është Jahir Kabashi 23 vjeç nga Prizreni, i cili ndodhej në Durrës për të kaluar fundjavën së bashku me të vëllanë.

Të dy vëllezërit po bënin plazh në sektorin “Apolonia” fare pranë vendit ku pak ditë më parë u arrit të zhvendosej një anije, e cila kishte ngecur në breg prej disa muajsh.

Për të zhvendosur anijen punëtorët ishin detyruar të thellonin fundin e detit rreth e qark anijes.

Nga të dhënat e para mësohet se dy vëllezërit, të cilët nuk dinin not, pa ditur, kanë rënë në gropën e thellë të krijuar pas zhvendosjes së anijes.

Sipas medieve në Tiranë, disa fëmijë që po notonin me gomone të vogël i kanë ardhur në ndihmë njërit prej vëllezërve, ndërsa 23-vjeçari është përpirë nga fundi i detit.

Është dashur ndërhyrja e polumbarëve të forcave speciale të RENEA-s për të bërë të mundur nxjerrjen e trupit të pajetë. Polumbarët thanë se gropa kishte qenë aq e thellë, sa dhe ato, specialistë të notit, ishin thithur nga fundi i detit krejt papritur.