Pezullohet përkohësisht procesi “Bllaca 2”

Prishtinë, 3 shkurt

Ndonëse të premten është pritur që të fillojë gjykimi për rastin “Bllaca 2” ndaj gjashtë të akuzuarve Shpresim Uka, Sadik Abazi, Fahredin Gashi, Shaban Syla, Bekim Syla, Driton Hajdari, ky proces është pezulluar përkohësisht. Procesi gjyqësor do të zhvillohet nën akuzën e ngritur nga prokurori Maurisio Salustro. Në arsyetimin e mbrojtjes thuhet se i njëjti gjyqtar ka qenë anëtar i panelit edhe në rastin e parë të gjykimit të Fahredin Gashit, ku Nazim Bllaca ka qenë dhe është dëshmitar bashkëpunues. Pikërisht kjo ishte edhe çështja që bëri të shtyhet procesi gjyqësor, pasi që një dëshmitar si Nazim Bllaca, i cili ka dëshmuar në dosjen e parë, ku është dënuar Fahredin Gashi me 18 vjet burgim, e anëtar i trupit gjykues në atë proces gjyqësor ka qenë Torre Tomason dhe sipas mbrojtjes deklarata e Bllacës ka qenë e besueshme për atë trup gjykues. Dhe, pikërisht Torre Tomason të premten ishte kryesuesi i trupit gjykues, pra ai e udhëhiqte procesin gjyqësor të ashtuquajtur “Bllaca 2”. Emërimi i këtij gjyqtari në këtë trup gjykues hasi në kundërshtime të mbrojtjes, e cila është kundër pranisë së tij si kryetar i këtij trupi gjykues, duke u bazuar në norma ligjore dhe në të njëjtën kohë kërkuan verbalisht përjashtimin e tij nga trupi gjykues i procesit gjyqësor “Bllaca 2”. Avokatët mbrojtës të të akuzuarve deklaruan se edhe me shkrim do ta bëjnë deponimin e kërkesës së tyre në adresë të kryetarit të Asamblesë së Gjyqtarëve të EULEX-it. Pezullimi i procesit gjyqësor, ndonëse ndodh deri në nxjerrjen e vendimit nga ana e KAGJE-së, Françesko Florit, kryetari i trupit gjykues, Torre Tomason, ka kërkuar se, pavarësisht vendimit, palët të paraqiten në gjykatë në seancën e radhës, siç ka qenë e planifikuar më datën 26 shkurt.