Plumba në dhomën e gjumit

Gjilan, 20 shkurt

Një 38-vjeçar në Gjilan është gjuajtur me armë zjarri në dhomën e tij të gjumit nga persona deri më tani të panjohur, por ka shpëtuar pa lëndime. A. Sh. (1974), shtetas i Republikës së Kosovës, me banim të përhershëm në Gjilan, ka deklaruar në polici se ishte gjuajtur me armë zjarri në dhomën e tij të gjumit. Ankuesi ka thënë se kishte vërejtur në murin e dhomës dy plumba, si dhe dy vrima në xhamat e dritares së dhomës së tij. Ai ka hedhur dyshime te një person nga Gjilani, me të cilin, siç ka thënë, kishte pasur probleme edhe më herët. Ismet Hashani, zëdhënës i PK-së në Gjilan, ka thënë se deri më tani janë intervistuar disa persona, por ende nuk është arrestuar askush.