Sulmohet personi në veturë

Kaçanik, 1 shkurt

Pesë persona janë arrestuar nga policia e Kaçanikut nën dyshimin se kanë qenë të përfshirë në një incident, të cilin autoritetet e rendit e kanë vlerësuar si vrasje në tentativë dhe armëmbajtje pa leje. Autoritetet policore në Kaçanik, kanë raportuar se ngjarja ka ndodhur mbrëmë rreth orës 19:00 në fshatin Kovaçec. Raportohet se B. G. 22 vjeç, derisa me veturën e tij po qarkullonte në drejtim të fshatit Kovaçec, atë e kishte tejkaluar një veturë tjetër duke u ndalur dhe duke ia bllokuar rrugën. Zëdhënësi i PK-së për rajonin e Ferizajt, togeri Agim Gashi shprehet se nga vetura kishin dalë katër persona: (F. T. 23 vjeç, S. T. 25 vjeç, M. T. 22 vjeç dhe Sh. E. 24 vjeç). Ata, kanë arritur të futen në veturën e B. G. duke e sulmuar me mjete të forta. Ky i fundit kishte nxjerr revolen dhe kishte shtënë dy herë. Me këtë rast, është lënduar lehtë në dorën e majtë ( F. T.). Pjesëtarë të Njësitit të Hetimeve dhe Patrullës Sektoriale të policisë së Kaçanikut, kanë konfiskuar armën, ndërsa të lënduarin e kanë dërguar në Shërbimin Emergjent. Ndërkohë të pesë personat e përfshirë në këtë incident janë arrestuar dhe po mbahen në Qendrën e Paraburgimit.