Suspendohet prokurori Fahri Nuhiu

Komisioni Disiplinor i Këshillit Prokurorial të Kosovës të mërkurën ka marrë vendim për suspendimin e prokurorit të Prokurorisë së Qarkut në Gjilan, Fahri Nuhiu. Vendimi për suspendimin e prokurorit Nuhiu, sipas burimeve të gazetës ka ardhur për shkak të neglizhencës së tij gjatë ushtrimit të funksionit prokurorial. Gazeta ka provuar të kontaktojë anëtarët e Komisionit të Këshillit Prokurorial për të mësuar më shumë rreth suspendimit të prokurorit në fjalë, mirëpo ka qenë e pamundur për të marrë ndonjë përgjigje nga këta të fundit. Megjithatë, burime të sigurta të gazetës kanë pohuar se vendimi për suspendim të prokurorit Nuhiu ka ardhur pas transmetimit të një storie në mediet, ku është raportuar për shkeljet procedurale që janë bërë gjatë një seance gjyqësore në Gjilan më 21 nëntor 2011 kundër të pandehurit Beki Vrajolli, i cili akuzohej për vepër penale, ku prokurori në fjalë nuk kishte përfillur procedurat gjyqësore. Prokurori Fahri Nuhiu gjatë kësaj seance nuk i kishte lexuar aktakuzën të pandehurit për të cilën obligohet ligjërisht, ndonëse në procesverbal e gjithë seanca përshkruhej sipas procedurave. Në këtë raport thuhej se procesverbali konstatonte se prokurori ia lexon të pandehurit aktakuzën, gjë që në fakt nuk ishte bërë leximi verbal i aktakuzës nga prokurori duke shkelur nenin 314, paragrafi 3 i KPPK-së. Prokurori në fjalë kishte propozuar që aktakuza të konfirmohet, sepse ka prova të mjaftueshme dhe është e bazuar. Të gjitha këto parregullsi duket ta kanë sjellë Komisionin Disiplinor të Këshillit Prokurorial të Kosovës në marrjen e vendimit për suspendim të prokurorit Fahri Nuhiu.