Vdes nga goditja e rrymës

Shtime, 6 shkurt

Mbrëmë, rreth orës 22:00, policia ka njoftuar se ka ndodhur një rast tragjik në Shtime. Një i ri 19-vjeçar ka gjetur vdekjen si pasojë e goditjes së rrymës elektrike. Sipas policisë, rasti ka ndodhur mbrëmë, në orët e vona, në rrugën “Smajl Gorani”, derisa viktima kishte shkuar për t’u pastruar në banjë. Zëdhënësi rajonal i policisë së Ferizajt, togeri Agim Gashi, ka thënë se bëhet fjalë për të riun B. B 19-vjeçar, të komunitetit ashkali. “Dyshohet që i riu ka pësuar si pasojë e goditjes së rrymës. Familjarët kanë pohuar se i ndjeri, në orët e pasdites, kishte shkuar për t'u pastruar në banjën e shtëpisë së re të pabanuar. Pas rreth 2 orësh, familjarët kishin hapur me forcë derën e banjës, duke e gjetur viktimën në gjendje alivanosje”, ka thënë Gashi. Mësohet se pas dhënien së ndihmës së parë në QMF në Shtime, viktima në gjendje të rëndë, është dërguar në QKUK në Prishtinë ku edhe ka ndërruar jetë. Lidhur me rastin është njoftuar edhe Prokuroria e Qarkut, e cila ka urdhëruar që trupi i pajetë të dërgohet në Institutin e Mjekësisë Ligjore, ndërsa me hetimin e rastit është duke u marrë Njësiti i hetimeve rajonale të Ferizaj.