Ambienti i bardhë si bora

Ngjyra e bardhë në enterier përshtatet me të gjitha stinët. Ajo është neutrale, e pastër, e ndritshme dhe e bukur. Kur të mbizotërojë dhe të mbulojë muret, dyshemetë, mobiliet, e edhe pjesën më të madhe të stolive dhe detajeve, do të mund të mendohej se rezultati do të jetë i mërzitshëm dhe pa shije, por në fakt nuk ndodhë një gjë e tillë. Ambienti i bardhë si bora të relakson, është shumë i këndshëm, gjë që nuk mund të arrihet me asnjë ngjyrë tjetër.

Në mënyrë që të fitohet përshtypja se ambienti është tërësisht i bardhë, nuk është thënë që bash çdo gjë të jetë me këtë ngjyrë. Përkundrazi, çdo ngjyrë tjetër mund të jetë e pranishme në detaje, e edhe në disa pjesë të mobilieve.

Me rëndësi është që dyshemeja dhe muret të jenë të bardha dhe efekti do të ketë sukses. Mobiliet më të mëdha, sikur që është ormani, krevatet, garniturat për ulje, si dhe perdet dhe tepihët, mund të kenë tone të çelëta të së hirtës, ngjyrës bezhë dhe vjollcë të çeltë, sepse ato janë neutrale.

Natyrisht, në enterierin e bardhë preferohet që detajet të jenë me ngjyra të kundërta, në mënyrë që të mos krijohet një ambient "i vdekur" pa shpirt dhe pa vulë personale. Por, kjo duhet të jetë sa më pak që të mundni, për ta arritur efektin e bardhësisë. Detajet mund të jenë korniza të fotove, fotografi, lule, saksi, pajisje teknike, libra, etj. Ato duhet të jenë të shpërndara në ambient lirshëm. Jastëkët me lesh, mbulesat, shtrojat, çajniku me filxhanë, janë një dekor i mrekullueshëm për ambientin dimëror.