Fotoaparatet më të lehta kompakte

Kompania “Sony” ka nxjerrë në treg modelet e reja të fotoaparateve kompakte, të cilët janë shumë të lehtë për t’u përdorur, kurse fotografët tani mund të kënaqen me një kualitet të mrekullueshëm të fotografive dhe me një shpejtësi të madhe të incizimit.

Pjesëtarët e rinj të familjes, “NEX-5” dhe “NEX-3” kombinojnë fotografinë e kualitetit “DSLR” dhe prakticitetin e objektivëve të ndryshueshëm në dizajnin e ri, i cili mund të bartet edhe në xhep.

Për dallim nga modelet konvencionale ‘DSLR’, konstruksioni pa pasqyrë zvogëlon trashësinë e këtyre dy fotoaparateve në vetëm 24,2 mm në pjesën e tyre më të hollë. Përmirësim të ri paraqet edhe shtëpiza e fortë, por e lehtë e fotoaparatit “NEX-5”.

“Zemër” e të dy fotoaparateve është censori “Exmor APS HD CMOS” me rezolucion prej 14,2 megapikselësh efektivë.

Kualiteti i fotografive dhe video-incizimeve përmirësohet edhe më shumë nga procesori i fuqishëm “BIONZ”, i cili garanton reflekse të shpejta incizuese, qartësim automatik preciz dhe vonesë minimale të mbyllësit.

“NEX-5” dhe “NEX-3” janë po ashtu fotoaparatet e para që ofrojnë një lehtësim shtesë me rastin e incizimit të videove HD. Video incizimi HD (1920 x 1080i) mund të shikohet në HD TV.