"iCloud" i ka 100 milionë përdorues

Më se 100 milionë njerëz janë paraqitur për të shfrytëzuar shërbimin 'iCloud' të 'Apple', të cilin kjo kompani e ka prezantuar në muajin tetor, ka bërë të ditur drejtori gjeneral i kompanisë, Tim Kuk. Ai, duke folur në konferencën vjetore në 'Goldman Sachs', përsëri e ka përshkruar këtë shërbim si pjesë të strategjisë së kompanisë për dekadën e ardhshme dhe ka shtuar se tashmë më se 100 milionë njerëz janë duke e përdorur këtë opsion. Ai gjithashtu ka theksuar se 'iCloud' nuk do të jetë një prodhim që do të jetë aktual gjatë dy viteve të ardhshme, por se bëhet fjalë për një produkt, i cili është dizajnuar për afat të gjatë dhe që ka për qëllim që t'i mundësojë kompanisë që t'u sigurojë përdoruesve të saj një zgjidhje për ruajtje të të dhënave, e cila është gjithmonë dhe nga secili vend në dispozicion me zgjerim të vazhdueshëm të kapacitetit.