Vjen seria e re e lap-topëve "Asus N"

Ka kohë që "Asus" ka paralajmëruar lap-topët multimedialë të serisë N, e tani ata kanë ardhur edhe zyrtarisht. Seria N e laptopëve të "Asus"-it për vitin 2012 përbëhet modelet prej 14, 15 dhe 17 inçësh. Karakteristika kryesore e këtyre laptopëve do të jetë se do të bazohen në procesorët "Intel Ivy Bridge" dhe në kartelat grafike "Nvidia GeForce GTX 670M". Po ashtu, këto pajisje "notebook" do të kenë një memorie deri në 16 GB DDR3, një hard disk prej 750 GB, kamerën ueb HD, si dhe një shkrues DVD apo "Blu-ray kombo". Të gjitha këto pajisje do të dizajnohen për shfrytëzuesit multimedialë dhe do të mbështesin edhe "Asus SonicMaster Premium Bang & Olufsen ICEpower" si dhe tastierën e qëndrueshme në pluhur. Rreth datës së saktë të fillimit të shitjes dhe çmimeve, kompania ende nuk ka dhënë ndonjë njoftim.