Viti i katastrofave, 360 milionë dollarë i kushtoi SHBA’së viti 2017

  • 09 January 2018 - 18:48
Viti i katastrofave, 360 milionë dollarë i kushtoi SHBA’së viti 2017

Fatura përfundimtare e katastrofave natyrore në Shtetet e Bashkuara arriti në 306 miliardë dollarë. Shifra konfirmohet nga një studim, që e rendit vitin 2017 si më të shtrenjtin në histori sa i përket dëmeve materiale të shkaktuara. Uraganët, zjarret dhe përmbytjet ishin disa nga fenomenet shkatërruese më madhore të vitit që lamë pas.

Mes uraganëve, përmbytjeve dhe zjarreve, fatura e Shteteve të Bashkuara për katastrofat natyrore në 2017 arriti në 306 miliardë dollarë.

Sipas një studimi të Administratës Kombëtare Oqeanike dhe Atmosferike, shifra e regjistruar eklipson rekordin e mëparshëm të vendosur në vitin 2015, kur Shtetet e Bashkuara u përballën me 215 miliardë dollarë dëme për shkak të katastrofave natyrore.

Në krye të listës së fenomeneve shkatërruese ishte uragani Harvey, që shkaktoi plot 125 miliardë dollarë dëme, i ndjekur nga uraganët Maria dhe Irma, me nga 90 dhe 80 miliardë dollarë dëme respektivisht, transmeton oranews.

Kështu, vetëm në 2017, Shtetet e Bashkuara u goditën nga 3 prej 5 uraganëve më të fuqishëm që vendi ka përjetuar.

Edhe zjarret shkaktuan jo pak dëme në SHBA, teksa përllogariten 18 miliardë dollarë humbje deri në momentin kur flakët janë shuar tërësisht.

Sipas studimit në fjalë, shifra është 3-fishi i rekordit të mëparshëm.

Pjesërisht fajtore për këtë situatë ishte edhe ngrohja globale, teksa ekspertët ngrenë alarmin se disa prej fenomeneve ekstreme të ndodhura gjatë vitit janë pasojë e temperaturave të regjistruara mbi mesataren.

(Kosova Sot)