Turqia urdhëron arrestimin e 200 ushtarakëve për lidhjet me Gylenin

Mediet shtetërore kanë raportuar se prokurorët turq e kanë urdhëruar arrestimin e më shumë se 200 ushtarakëve për lidhje të dyshimta me puçin e dështuar të vitit 2016. Prokurori publik i Stambollit e ka urdhëruar arrestimin e 219 personave që janë pjesë e personelit ushtarak, përfshirë katër kolonelë dhe pesë lejtnantë.

Qeveria turke e ka fajësuar klerikun Fetullah Gylen për organizimin e puçit, gjatë të cilit ishin vrarë 250 njerëz. Sidoqoftë, ai i ka mohuar këto akuza. Prej asaj kohe, autoritetet turke i kanë arrestuar më shumë se 50 mijë njerëz, përfshirë shërbyes civilë, gazetarë dhe mësues, të cilët dyshohen se janë përkrahës të Gylenit.

Mijëra të tjerë janë shkarkuar nga vendet e punës për të njëjtat dyshime. Kritikët e Erdoganit e akuzojnë atë se e ka shfrytëzuar puçin e dështuar si pretekst për t’i luftuar kundërshtarët. Në anën tjetër, autoritetet turke kanë deklaruar se këto masa janë të nevojshme për t’i luftuar kërcënimet e sigurisë kombëtare, shkruan “Free Europe”

(Kosova Sot)