Hoti: Partia e Shpend Ahmetit drejt zhdukjes, s’e kalon as pragun

Shefi i Grupit Parlamentar të LDK’së, Avdullah Hoti, ka dhënë parashikime të zeza për Partinë e Shpend Ahmetit, e cila po përkrah dialogun me Serbinë. Ka thënë se PSD do të zhduket nëse nuk i bashkëngjitet Qeverisë meqë s’kanë vota as për ta kaluar pragun.

“Ata nuk e kalojnë pragun. Praktikisht zhduken si parti në politikë. Sepse një gjë është e vërtetë se si PSD nuk kanë legjitimitet qytetar. Ata kanë zënë vendet në Parlamanet me një parti tjetër. Është e shëndeteshme që të verifikohen këto mandate”, ka thënë Hoti.

PSD ka vendosur të hyjë në dialogun me Serbinë të udhëhequr nga Fatmir Limaj e Shpend Ahmeti. Kanë propozuar rezolutë me të cilën definojnë edhe temat e dialogut dhe platformën.

Më herët, Shpend Ahmeti bashkë me Dardan Molliqajn e Visar Ymerin kanë kundërshtuar çfarëdo bashkëpunimi me Kadri Veselin e Ramush Haradinajn.

Tash kanë vendosur të shkojnë në dialogun e Brukselit bashkë me Veselin, Haradinajn e Limajn.

Përpos LDK edhe VV ka dalë kundër një dialogu të tillë me Serbinë.

 

(Kosova Sot)