Kapet sasi rekorde prej 3.2 tonësh të fildishit në Kamboxhia

Autoritetet doganore të Kamboxhias i kanë zbuluar më shumë se 3.2 tonë të fildishit afrikan që ishte fshehur në një kontenjer të madh që po vinte nga Mozambiku. Gjetja e 1026 dhëmbëve në portin autonom “Phnom Penh” u bë me ndihmën e të dhënave sekrete nga ambasada amerikane.

Dërgesa kishte arritur në port vitin e kaluar, por marrësi i panjohur nuk arriti asnjëherë në port për ta marrë atë. Kërkesat për fildish nga Kina dhe Vietnami kanë bërë që Kamboxhia të bëhet vend transit i tregut ilegal të fildishit. “Dhëmbët e elefantit ishin fshehur nën copa të mermerit në një kontenjer që ishte braktisur”, tha Sun Chhay, drejtor i doganave në port.

Ai tha se nuk dihet nëse dërgesa ka qenë e destinuar për të qëndruar brenda shtetit apo për t’u transportuar në shtete tjera. Kamboxhia kohëve të fundit ka arritur të bëjë konfiskime të nivelit të lartë, sidomos në pesë vitet e fundit. Sasia më e madhe e gjetur e fildishit, para rastit të fundit, ishte ajo e vitit 2014, kur autoritetet kishin zbuluar tre tonë fildish, shkruan “BBC”

(Kosova Sot)