Fillon në Bruksel gjyqi kundër terroristit
Pesë vjet pas sulmit me katër të vrarë në Muzeun Hebre, në Belgjikë del para gjyqit i akuzuari, për të cilin dyshohet të jetë terrorist i Shtetit Islamik.
I akuzuari Mehdi Nemmouche konfirmoi vetëm identitetin e tij në fillim të procesit gjyqësor, në Pallatin e Drejtësisë në Bruksel. Ai tha me pak fjalë se ishte i papunë dhe si vendbanim dha adresën e paraburgimit. Për të gjitha akuzat e prokurorisë francezi 33-vjeçar ka heshtur qysh prej arrestimit të tij, disa ditë pas atentatit, në majin e 2014-ës. Por avokati i tij tha në gjyq se i dyshuari si atentator i sulmit në Muzeun hebre në Bruksel, si pasojë e të cilit gjetën vdekjen katër vetë, do të flasë gjatë seancave gjyqësore.
Javën e ardhshme, përpos Nemmouches-ë, do të merret në pyetje edhe ndihmësi i dyshuar i tij, Nancer Bendrer. Të enjten, 10.01.2019, prokurorët nisën leximin e aktakuzës me gati 200 faqe. Në mënyrë të detajuar ata përshkruan rrjedhën e ngjarjes, jetën e mëparshme të të akuzuarit dhe radikalizimin e Mehdi Nemmouche-së në burgjet e Francës, qëndrimin e tij në Siri dhe aktivitetet e mundshme të tij në kuadër të organizatës terroriste "Shteti Islamik".
Avokati i të pandehurit kryesor, Sebastien Courtoy, i kishte thënë gazetës "Le Soir" se do të provonte pafajësinë e klientit të tij. Sipas tij, Mehdi Nemmouche nuk është autor i sulmit në Muzeun hebre. Armët e gjetura gjatë arrestimit të tij në Marsejë nuk janë provë e mjaftueshme, thotë avokati. Kurse prokuroria beson se ato janë armët me të cilat është bërë vrasja. Prokurorët dhanë si provë për autorësinë e Nemmouche-së edhe një video nga një kamera survejimi e Muzeut Hebre si edhe një fotografi të gjetur tek i akuzuari. Në foto shihet një armë e tipit AK-47, municion dhe një banderolë në arabisht me mbishkrimin: "Këto janë armët që kam përdorur për vrasjen."
Katër viktima
Më 24 maj 2014, gjatë zgjedhjeve për Parlamentin Evropian, Mehdi Nemmouche, dyshohet të ketë depërtuar në Muzeun hebre, në Bruksel. Sipas prokurorisë, ai vrau te hyrja e muzeut, me një Kalashnikov një çift nga Izraeli, Mira dhe Emmanuel Riva, të cilët ndodheshin në Belgjikë si turistë për të festuar 18-vjetorin e martesës. Ata lanë pas dy djem të moshave 15 dhe 16-vjeçare. Ai vrau edhe 66-vjeçarin Dominique Sabrier, i cili punonte në muze si vullnetar. Një punonjës tjetër i muzeut, Alexandre Strens (26), vdiq disa ditë më pas si pasojë e lëndimeve të rënda. E jëma e tij është bashkëpaditëse. Avokati i familjes dëshiron të ndriçojë mbi të gjitha sfondin e krimit. Ai dyshon se i pandehuri Nemmouche nuk ka pasur si synim vetëm objektin.
Eksperti i terrorizmit, Thomas Renard, nga Instituti Egmont në Bruksel, beson se Mehdi Nemmouche është një terrorist i Shtetit Islamik i kthyer në Europë nga Siria. "Ai ka qenë në kontakt me një grup 'luftëtarësh' të cilët më vonë u përfshinë në sulmet terroriste në Bruksel dhe Paris," tha Thomas Renard për DW.
Meqë njëra nga viktimat, Mira Riva, kishte punuar si ekonomiste për shërbimin e fshehtë izraelit, Mossad, në prag të gjyqit qarkullonin edhe disa teori konspiracioni, sipas të cilave, pas atentatit qëndronte Mossad-i.
Avokati i të pandehurit kryesor thonë se videot janë të manipuluara dhe se në to ka disa pika të mjegullta e sipas tij aty ka pasur edhe persona të tjerë. Rreth 120 dëshmitarë janë thirrur nga prokurorët dhe mbrojtja. Procesi duhet të përfundojë në mars. Nëse Mehdi Nemmouche shpallet fajtor, ai do të dënohet me burgim të përjetshëm.
(Kosova Sot)
