Morën mall pa paguar e më pas penguan policët në detyrë, ngritet aktakuzë ndaj dy personave

  • 21 shkurt 2019 - 15:13
Morën mall pa paguar e më pas penguan policët në detyrë, ngritet aktakuzë ndaj dy personave

Prokuroria e Gjilanit ka ngritur aktakuzë ndaj dy personave për dy vepra penale. Përmes komunikatës për media, është bërë e ditur se aktakuzë është ngritur ndaj të pandehurve L.K. dhe A.SH., të cilët gjendet nën masën e arrestit shtëpiak që nga data 7 shkurt 2019

Sipas aktakuzës, i pandehuri A.SH., më 7 shkurt 2019, ka shkuar tek ‘’HIB Petrol’’, në komunën e Gjilanit, së bashku me të pandehurin L.K., të cilët ishin në gjendje të dehur, me ç’rast i pandehuri A.SH., fillimisht kërkon një pako cigare, pastaj një mbushje të telefonit, të cilat nuk i paguan, ku pas kësaj e detyron shitësin, tani të dëmtuarin B.S, që të ulej në tavolinë me të njëjtit, me ç’rast  ka detyruar të dëmtuarin që të vepronte kundër vullnetit të tij.

Me këto veprime, i pandehuri A.SH., ka kryer veprën penale ‘’Detyrimi’’ nga neni 340 paragrafi 1 të Kodit Penal të Republikës së Kosovës.

Ndërsa, i pandehuri L.K., ka penguar personat zyrtar në kryerjen e detyrave zyrtare, në atë mënyrë që zyrtarët policor H.P. dhe A.R., fillimisht i ka kanosur me fjalë, pastaj i ka penguar, duke i kapur për uniforme, gjatë kohës kur tentonin t’a arrestonin të pandehurin A.SH.

Në këtë mënyrë, i njëjti ka kryer veprën penale ‘’Pengim i personit zyrtar në kryerjen e detyrave zyrtare’’ nga neni 409 paragrafi 5 të KPRK-së

(Kosova Sot)