Daçiq: Populli shqiptar nuk mund t'i ketë dy shtete

  • 26 prill 2019 - 16:40
Daçiq: Populli shqiptar nuk mund t'i ketë dy shtete

Për Serbinë nuk mund të ketë dy shtete shqiptare në Ballkan, ndërsa është çështje kohe derisa Kosova dhe Shqipëria të bashkohen. Këto deklarata janë të ministrit të Jashtëm të Serbisë Ivica Daçiq, bërë gjatë një interviste për televizioni Russia Today. Ai foli dhe për takimin e Berlinit, për të cilin tha se nuk synon vazhdimin e bisedimeve midis Prishtinës dhe Beogradit. 

Krijimi i Shqipërisë së Madhe është kërcënimi më i madh për stabilitetin e rajonit të Ballkanit. Këtë frikë përcolli ministri i Jashtëm serb Ivica Daçiq, gjatë një interviste për stacionin televiziv “Russia Today”.

Daçiç gjithashtu i mëshoi idesë së krijimit të kombeve shtete dhe ndarjes në vija etnike kur tha se kombi shqiptar nuk mund të ketë dy shtete.

“Çdonjëri duhet ta ketë të qatë se asnjë komb në Europë nuk ka dy shtete. Populli shqiptar nuk mund të ketë dy shtete. Kjo utopi duhet të marrë fund. Ata që mbështesin Kosovën, mbështesin edhe Shqipërinë e Madhe, sepse është çështje kohe derisa Kosova dhe Shqipëria të bashkohen”, tha Daçiq.

Gjatë intervistës kreu i diplomacisë serbe përsëriti qëndrimin e Beogradit se dialogu me Prishtinën do të fillojë kur të anulohen tarifat për mallrat e Serbisë. Daçiq i paralajmëroi edhe për kundërmasa në rast se autoritetet e Prishtinës nuk tërhiqen. 

Në lidhje me takimin e 29 prillit të thirrur nga kancelarja gjermane Angela Merkel dhe kreu frencaz Emmanuel Macron, ministri i Jashtëm i Serbisë tha se takimi është për zgjidhjen e problemeve në Ballkan dhe jo për vazhdimin e bisedimeve midis Prishtinës dhe Beogradit.

(Kosova Sot)