Denoncon Kapiti: Injorantët dhe servilët e drejtësisë i shërbejnë politikës, krimit dhe korrupsionit
Njohës të fushës së drejtësisë vazhdojnë ta drejtojnë gishtin dhe të tregojnë se sa thellë është inkriminuar sistemi i drejtësisë në Kosovë, ku prokurorët as që guxojnë të merren me njerëzit e fuqishëm që janë bërë të paprekshëm, qofshin pushtetarët ,ashtu edhe mafio-oligarkët e nëntokës kriminale. Me të tillët as që guxon të merren, por i injorojnë edhe rastet e denoncuara, si Prokuroria Speciale dhe prokuroritë themelore. Të dy nivelet vazhdojnë t`i injorojnë lëndët e kallëzimeve penale që I kanë të deponuara në zyrat e tyre,duke i mbajtur në STATUS QUO ose edhe I mbyllin, pasi që bëhet fjalë për padi kundër ministrave,kryetareve të komunave e edhe mafio-oligarkëve të inkriminuar.
Eksperti i kësaj fushe, Skënder Kapiti, tha për “Kosova Sot Online” se drejtësia si tërësi, si gjyqtarët dhe prokurorët kanë dy arsye pse ata nuk guxojnë që ta zbatojnë ligjin në mënyrë korrekte , të pa anshme dhe të moralshme. “Kjo sepse ata janë emëruar pa asnjë kriter dhe ftesi profesionale. Ashtu sikurse janë parlamentet me deputetët, qeveritë me ministrat, pushteti vendor me kryetarët e kuvendarët dhe administratat e tyre, po nga ai "bylmet" janë edhe gjyqtarët e prokurorët, si në Shqipëri ashtu edhe në Kosovë. Janë emëruar në punën e drejtësisë injorantët dhe servilët e përzgjedhur nga politika për t'i shërbyer asaj, krimit dhe korrupsionit të saj, dhe si të tillë ata janë amoralizuar edhe në qoftë se kanë pasur ndonjëri prej tyre ndonjëherë ndopak profesionalizëm, dinjitet e personalitet”, tha Kapiti për “Kosova Sot Online”.
Çështja e dytë sipas Kapitit është se ata edhe ashtu nuk guxojnë që ta zbatojnë ligjin njëlloj për të gjithë qytetarët por përdorin standarde të ndryshme, sipas kërkesës së vartësve të tyre.
“Ata në punën e tyre përdorin dy standarde. Ata kanë neglizhencën , fshehjen , manipulimin e lëndëve e deri edhe mbrojtjen apo avokatinë për "të mëdhenjtë", për "peshkaqenët" e VIP-at e politikës dhe të pushtetit të krimit e korrupsionit. Ata, pra gjyqtarët e prokurorët pa përjashtuar as avokatët janë vetë gjithashtu pjesë e korporatës së hajnisë, krimit të korrupsionit, si dhe të krimit të tyre specifik, të krimit ligjor, të trafikimit dhe të pazareve me ligjin. Dhe duke qenë komponent i këtij sistemi korruptivo-kriminal ata do t'i shërbejnë detyrimisht atij sistemi, dhe gjithçka çfarë flasin dhe deklarojnë për ligjin e drejtësinë është vetëm deklarim hipokrizie, mashtrimi dhe fasade fshehjeje e korrupsionit e të pasurive të tyre”, theksoi Kapiti për “Kosova Sot Online".
Pradnaj, sipas Kapitit, "vetëm VETTING-u do të ishte ilaçi i cili do ta pastronte dhe do ta çmontonte këtë sistem, këtë përbindësh kriminal e korruptiv politik e juridik që ka kapur dhe paralizuar drejtësinë, shtetin , ligjin , demokracinë dhe shoqërinë si tërësi".
(Kosova Sot Online ).
