Thaçi fajtor për dëbimin e gylenistëve – raporti i Komisionit lajm edhe për mediat amerikane

  • 15 maj 2019 - 22:56
Thaçi fajtor për dëbimin e gylenistëve – raporti i Komisionit lajm edhe për mediat amerikane

“Një komision hetimor parlamentar në Kosovë e ka fajësuar presidentin për urdhërimin e dëbimit të pesë mësuesve turq dhe të një mjeku turk vitin e kaluar”.

Kështu ka raportuar sot agjencia ndërkombëtare e lajmeve, Associated Press, shkrimin e të cilës e ka publikuar edhe portali i rrjetit televiziv amerikan, Fox News.

“Gjashtë turqit janë dëbuar tinëzisht nga Prishtina me një avion turk në marsin e vitit 2018. Ata supozohet se kanë punuar në shkolla në pronësi të Fethullah Gylenit, një klerik të cilin qeveria e presidentit turk, Recep Tayyip Erdogan, e fajëson për një përpjekje për puç”, thuhet më tej në shkrim.

“Kryeministri i Kosovës e ka shkarkuar ministrin e tij të Brendshëm dhe shefin e inteligjencës të vendit për shkak të dëbimit tinëzar të turqve, pa lejen e tij”.

“Ligjbërësi Xhelal Sveçla ka thënë të mërkurën se një projektraport është votuar nga të gjithë anëtarët e komisionit, me përjashtim të njërit, që përfaqëson Partinë Demokratike, të cilën dikur e kishte udhëhequr presidenti Hashim Thaçi. Për raportin do të zhvillohet debat në Kuvend”, përfundon shkrimi.


(Kosova Sot Online)