UNMIK: Informacionet e dhëna nga Policia nuk përputhen me tonat

Misioni i Kombeve të Bashkuara në Kosovë, UNMIK ka reaguar përsëri për aksionin e Policisë në veri, ku u arrestua një numër i madh i zyrtarëve që dyshohet se janë të ndërlidhur me krimin e kontrabandën.

Përmes një njoftimi, ky mision thekson se informacionet e shpalosura nga Policia e Kosovës nuk përputhen me ato të tyre, dhe se sipas njoftimit, në këtë operacion është përdorur dhunë gjatë arrestimit të dy zyrtarëve të UNMIK-ut.

Sipas tyre, Policia e Kosovës nuk i ka dhënë UNMIK-ut prova të qarta për këtë operacion.

Duke reaguar për arrestimin e zyrtarëve të tyre, UNMIK ka ritheksuar se këto veprime sipas tyre kanë shkelur imunitetin e pjesëtarëve të këtij misioni, si dhe protokollet tjera.

Në bazë të reagimit të këtij misioni, gjatë arrestimit ka pasur përdorim të panevojshëm të dhunës nga Policia e Kosovës.

Kujtojmë, se Policia e Kosovës kishte arrestuar 19 zyrtarë në operacionin e së martës në veri.

Ndaj tyre është kërkuar paraburgim, ndërkaq që Prokuroria Speciale ka bërë të ditur se ka edhe persona të tjerë të cilët janë në kërkim për shkak të dyshimit të bazuar se janë të përfshirë në disa vepra të ndryshme penale.

Ndërkaq, Kosova e ka shpallur person të padëshiruar rusin e arrestuar në këtë operacion, i cili ishte pikërisht pjesëtar i UNMIK-ut.

(Kosova Sot Online)