Ministria e Kulturës zotohet se për dëmtimin e artefaktit do të jepet llogari

  • 24 qershor 2019 - 09:36
Ministria e Kulturës zotohet se për dëmtimin e artefaktit do të jepet llogari

Ministria e Kulturës, Rinisë dhe Sportit përmes një komunikate për media ka reaguar për dëmtimin e artefaktit(Pitosit).

Ministri Gashi, ka shprehur shqetësimin e thellë për dëmtimin aksidental të artefaktit(Pitosit) në ambientet e Institutit të Kosovës për Mbrojtjen e Monumenteve.

Duke marrë shkas nga kjo ngjarje e rëndë që ka ndodhur, ministri Gashi ka kërkuar me urgjencë raport të detajuar nga i gjithë zinxhiri i hierarkisë në lidhje me këtë ngjarje të shëmtuar, pra dëmtimit nga pakujdesia e rëndë dhe e papranueshme e Pitosit, i cili ka qenë i ekspozuar në ambientet e IKMM-së.

Sipas Ligjit për Trashëgimi Kulturore dëmtimi dhe shkatërrimi i objekteve të luajtshme të trashëgimisë kulturore janë vepra të dënueshme dhe përbëjnë bazë për përgjegjësi në përputhje me legjislacionin penal dhe kundërvajtës, andaj sapo të pranohen raportet e të gjitha institucioneve dhe personave kompetentë në lidhje me këtë rast do të ndërmerren të gjitha veprimet konkrete në përputhje me legjislacionin në fuqi si dhe do të merren të gjitha masat ligjore për këtë rast.

“MKRS-ja siguron opinionin publik dhe të gjithë mekanizmat institucionalë se në çdo rast të tillë ajo nuk do ta tejkalojë pa llogaridhënie, duke vepruar me vendosmëri drejt zbatimit të kuadrit ligjor, i cili e obligon atë në korniza të mandatit për të ruajtur dhe mbrojtur me rigorozitet vlerat e objekteve dhe aseteve të trashëgimisë sonë të përbashkët kulturore” thuhet në komunikatën e Ministrisë.

(Kosova Sot Online)