Vjen akuza e radhës ndaj Qeverisë së Kosovës: Dështuan komandantët, por ushtarët e vërtetë...

“Prokurorët dhe hetuesit në vend se ti hetojnë këta ata kanë vendosur që të ju bashkohen. A keni parë prokurorë e hetues policor që e kanë problem pasurinë. Edhe unë them jooo”, tha Preteni për “Kosova Sot Online”.

Deputeti i Budestagut gjerman, Jens Kestner, që vjen nga partia e ekstremit të djathë AFD ( Alternative Fur Deutchldand), i ka hedhur akuza të rënda ndaj Qeverisë së Kosovës, për të cilën thotë aktualisht janë të ulur shumë kriminelë, dhe sipas tij ata nuk mund të arrestohen sepse mbrohen nga dikush.

E sipas njohësit të fushës së sundimit të ligjit, ish kreut të AKK-së, Hasan Preteni, kjo është një akuzë serioze jo vetëm për homologët e tij në politikën kosovare, por në mënyrë të veçantë për sistemin e drejtësisë në Kosovë që vazhdon të jetë i kapur dhe i nënshtruar nga politika.

“Po është e vërtetë, njësia matëse e korrupsionit është vetëm “perceptimi”, por qytetari i thjeshtë po e sheh produktin e korrupsionit edhe atë në baza ditore. Ka plotë politikanë që as nuk e kanë ditur se ku është Prishtina e sot deklarojnë prona milionëshe mu në Prishtinë. Deri dje s’ka pasur asgjë e tani ka shumë, po si,qytetari nuk ka qasje në dokumente por i sheh produktet”, tha Preteni për “Kosova Sot Online”.

Sipas Pretenit, deputeti gjerman e ka thënë të vërtetën e plotë ashtu sikur që po ndodhë, ngase informacionet që i jep janë të dala nga brenda institucioneve që korrespondojnë plotësisht me realitetin.

“Prokurorët dhe hetuesit në vend se t’i hetojnë këta ata kanë vendosur që të ju bashkohen. A keni parë prokurorë e hetues policor që e kanë problem pasurinë. Edhe unë them jo. Pastaj shkojnë hetuesit në një ndërmarrje publike ose në një ministri për të hetuar dhe aty hasin në titullarë që i kanë emëruar këta hetues dhe se mjetin më të fuqishëm e kanë shantazhin. Kosova, fatkeqësisht është pre e krimit të organizuar dhe shantazhit”, tha Preteni për “Kosova Sot Online”.

Se sa është kjo çështje serioze, sipas Pretenit, tregon rasti i prokurorit Elez Blakaj, i cili u detyrua të largohet nga vendi shkaku i shantazheve të politikës por edhe të kolegëve të tij të lidhur me politikën.

“Pastrimi i drejtësisë nga ndikimet politike, dhe eventualisht kthimi i Elez Blakajt në pozitën e kryeprokurorit të shtetit, me një mbështetje të fuqishme ndërkombëtare, do të mundë të ndryshonte shumë gjëra në politikë dhe në drejtësinë e dështuar e nënshtruar nga politike e inkriminuar. Kjo do të jetë nisma e mbarë. Të gjitha tjerat janë humbje kohe dhe vazhdim i avazit të vjetër.

Çlirimin e vendit e mundësuan luftëtarët e lirisë, veteranët e vërtetë, edhe krijimin e shtetit do ta ndihmojnë veteranët e vjetër. Elezi duhet të kthehet sepse çdo luftë duhet t’i ketë edhe ushtarët e vetë,edhe lufta për të bërë shtet do t’i ketë luftëtarët e vetë. Dështuan disa komandantë por nuk do të dështojnë ushtarët e vërtetë. Disa komandantë deklaruan pasuri që vetëm 5 nga ata kishin pasuri më shumë se buxheti i Kosovës. Të deklaruara, por sa kanë në të vërtetë kjo duhet të dëshmohet”, përfundoi Preteni për “Kosova Sot Online”.

(Kosova Sot Online)