Ja të gjitha rastet kur policia dështoi t`i mbrojë viktimat që përfunduan me vdekje

  • 17 July 2019 - 12:26
Ja të gjitha rastet kur policia dështoi t`i mbrojë viktimat që përfunduan me vdekje

Neglizhenca e Policisë së Kosovës, ka bërë që shumë raste të përfundojnë me fatalitet, njëjtë si rasti i fundit i 11-vjeçarit nga Fushë Kosova i cili u gjend i vdekur javën e kaluar, pas dhunimit. Policia kishte qenë e informuar që nga janari i këtij viti për rastin.

Valbona Marku – Nrecaj dhe Abid Jashari ishin dy viktimat tjerë, që pësuan me fatalitet ani pse Policia e Kosovës kishte qenë e informaur shumë më herët për rastet e tyre.

Vrasja e Valbona Markut – Nrecajt dhe vajzës së saj 9-vjeçare

Mbrëmjen e shtatë gushtit të vitit 2018 në Gjakovë ndodhi një ngjarje tronditëse. Pjetër Nrecaj, vrau gruan Valbonën dhe vajzën e tij 9 vjeçare.

Vrasja ndodhi në fshatin Brekoc, shtëpinë e vëllezërve të Valbonës – ku ajo jetonte me tre nga fëmijët e tyre, pasi që paraprakisht kishte pësuar dhunë fizike nga burri i saj. Problemet e çiftit kishin kohë që kishin filluar pas kërkesës së Valbonës për divorc. Pjetër Nrecaj kishte qëndruar rreth një muaj në paraburgim për veprën penale të “kanosjes” ndaj gruas.

Ditën e tragjedisë, Valbonës i kishte ardhur një mesazh kërcënues nga ai. E ndjera e kishte raportuar kërcënimin e burrit në polici – por këta të fundit nuk e morën seriozisht, shkruan Insajderi.

Policia e kishte pranuar se ka marrë informatën për kërcënimin, por thoshin se nuk e kishin gjetur të dyshuarin.

“Policia i janë përgjigjur rastit, kanë ndërmarrë veprimet operative duke e kërkuar të dyshuarin në shtëpinë e tij dhe në lokacione të ndryshme, është tentuar të kontaktohet edhe përmes telefonit por i njëjti nuk është paraqitur”, kishte thënë Lirie Podrimaj zyrtare për informim në Policinë e Kosovës.

Mos reagimin e menjëhershëm të Policisë në lidhje me rastin, tentojë ta arsyetojë nënkoloneli i policisë, Ahmet Hasi. Hashi tha se nuk është kërkuar urdhër-mbrojtje nga viktima.

Për Policinë e Kosovës nuk ka qenë i mjaftueshëm lajmërimi i kërcënimit nga e ndjera.

Brenda një muaji, Inspektorati Policor ka marrë dy vendime kundërthënëse lidhur me këtë vrasje të dyfishtë.

Në njoftimin e lëshuar më 16 gusht, Inspektorati kishte thënë se nuk e kishte gjetur ndonjë veprim të kundërligjshëm në trajtimin e këtij rasti.

Ndërsa një ditë më parë, në orët e mbrëmjes, njoftoi se tre zyrtarë policorë duhej të suspendoheshin si të dyshuar për keqpërdorim të autoritetit zyrtar.

Vrasja në qendër të Prishtinës

Një rrufe me plumba kishin qëlluar mbi trupin e Abid Jasharajt në qendër të Prishtinës.  Dyshohet se një mosmarrëveshje, që babai i tre fëmijëve e kishte me familjen e gruas së tij, e çoi drejt vdekjes atë.

Por një ditë para se në trupin e tij të shkrepen plumba, Abidi kishte raportuar në polici për kërcënimet që kishte marrë nga familja e gruas.

Policia e Kosovës ka dal me një sqarim për vdekjen e 34-vjeçarit, Abid Jashari gjatë ditës së djeshme në rrugën “Haxhi Zeka”, në Prishtinë.

Në njoftimin e policisë thuhet se Abid Jasharaj dhe miku i tij Besnik Shkodra 26-vjeçar kishin pasur një konflikt fizik me njëri tjetrin.

“Në ora 02:45 personi A.J. është paraqitur në stacionin policor Qendra në Prishtinë,  për të paraqitur një rast tjetër , ku ka deklaruar se i njëjti (vet ai) e ka sulmuar/rrahur djalin e mikut të tij (B.Sh. 26 vjeçar), për një fyerje (sms ofendues) dhe mosmarrëveshje në mes veti.Vlen të potencohet se gjatë kësaj kohe personi A.J. ka qenë i shoqëruar me mikun e tij (vëllain  tjetër të B.Sh.)”, thuhet në njoftimin e policisë. 

Sipas policisë, Jasharaj fillimisht kishte njoftuar policinë për mesazhet kërcënuese që i kishin ardhur nga miku i tij Besnik Jasharaj në telefonin e bashkëshortes së tij, por policia kishte kërkuar që në stacionin e policisë të paraqitej edhe gruaja e tij për ta bërë denoncimimin.

Tutje në sqarimin e policisë thuhet se “Personi A.J. rreth orës 03:30 është paraqitur  në stacionin policor Veri , për të deklaruar lidhur me pretendime te tij për mesazhet kërcënuese, që i kishte pranuar përmes telefonit nga miku i tij i cili gjendej në Austri”.

“Me që këto mesazhe kërcënuese kanë qenë indirekte, (pasi të njëjtat ishin dërguar në telefonin e bashkëshortes se tij, nga i njëjti është kërkuar që të ftohet bashkëshortja për ti sjellë mesazhet kërcënuese dhe për të deklaruar lidhur me rastin”, thuhet në njoftimin e policisë.

11-vjeçari i rrahur dhe dhunuar seksualisht

K.Veseli, 11-vjeçari, dyshohet se ishte dhunuar tri herë nga Sefedin Osmani, një 20-vjeçar. Këtë e kishte bërë të ditur edhe nëna e 11-vjeçarit, Makfire Veseli.

Makfire Veseli, kishte thënë se policia ka qenë e informuar që nga janari për të dyshuarin Sefedin Osmani. Ajo po ashtu thotë se edhe familja e të dyshuarit ka qenë e informuar për abuzimin që iu kishte bërë djalit të saj.

“Djali më dilte nëpër kanta dhe më vinte e qante më tregonte për rastin. Po unë njëherë e lashë. Nuk e lajmërova hiç policinë.  Mandej e lashë, erdhën vetë policia, që u lajmërua djali në polici. Unë kam qenë të familja jem. Kanë ardh policia e Fushë Kosovës. Edhe më thanë ‘Makfire a e din që e kanë dhunua djalin. Thashë po, djali më ka kallxu”, kishte thënë Makfrija për Express.

Policia e Kosovës, kishte qenë e informuar që nga janari i këtij viti për abuzimin seksual që iu kishe bërë 11-vjeçarit K.Veseli nga Fushë Kosova. Por nuk ishte marr asnjë veprim derisa K.Veseli ishte gjetur i vdekur pas shtatë muajve, të raportimit të rastit.

Abuzimi dhe dhuna ndaj K.Veselit kishte vazhduar deri të enjten e 11 korrikut, ku ishte gjetur i vdekur poshtë shkallëve të një kompleksi banesor në lagjen “Xhemail Mustafa”, në Fushë Kosovë.

(Kosova Sot Online)