A u takua Agim Veliu me Sami Lushtakun -flet nënkryetari i LDK’së
Nënkryetari i LDK-së, Agim Veliu që ka shfaqur ambicie për të marrë postin e të parit në këtë parti, u raportua se ka pasur një takim të fshehtë me një nga fytyrat më të rëndësishme në PDK, Sami Lushtakun. Në një bisedë për media, këto lajme, Veliu i ka quajtur shpifje, duke thënë se asnjëherë nuk është takuar me Lushtakun.
Mediat kanë raportuar sot se kryetari i Komunës së Podujevës, që mban edhe postin e nënkryetarit të LDK-së, Agim Veliu është takuar me ish-kryetarin e Skenderajt, Sami Lushtakun, që ka ndikim të madh në Partinë Demokratike.
Sipas një shkrimi të publikuar, ky takim u zhvillua në njërin nga restorantet më të njohura në këtë komunë, e si qëllim që ky të mbahej i fshehtë, në kohën kur pretendohet se këta të dy u panë, lokali u mbyll për klientë, e shërbimin e bëri vetë pronari.
Media për ta pyetur për këtë takim e ka kontaktuar nënkryetarin e LDK-së. Agim Veliu po thotë se një lajm i tillë është krejtësisht shpifje.
“Është shpifje e llojit të vet, unë nuk takohem me të edhe s’jam takuar kurrë (me Sami Lushtakun)”, tha Veliu, derisa ka thënë se gjithçka që është shkruar për të e për ish-kryetarin e Skenderajt është gënjeshtër.
“Unë ka një vit a më shumë që as nuk kam qenë në restorant, sot gjatë tërë ditës kam pasur takime me palë”, tha nënkryetari i LDK-së.
Veliu ka treguar haptazi se ka pretendime për të garuar me tre gusht për të parin e LDK-së.
Ky i fundit ishte akuzuar për lidhje me PDK-në kur ishte prishur koalicioni VLAN.
(Kosova Sot Online)