Prokuroria kërkon paraburgim për Burdush mashtruesin

Prokuroria Themelore e Prizrenit ka paraqitur sot kërkesën për caktimin e masës së paraburgimit për Hysri Peqanin, i njohur si “Burdushi”. Ai po dyshohet për ushtrim të kundërligjshëm i veprimtarisë mjekësore dhe veprën penale të shantazhit.

Zëdhënësja e Prokurorisë së Prizrenit, Fitore Mehmeti, dje i ka thënë medias se do të bëjnë kërkesë për paraburgim.

“Rasti në fjalë është vazhdimësi e rastit të mëhershëm. Prokurori ka lëshuar vendim për ndalimin e të pandehurit H.P., dhe pritet që gjatë ditës në Gjykatë të dorëzohet aktvendimi për zgjerim të hetimit, si dhe kërkesa për caktimin e masës së paraburgimit”, ka thënë Mehmeti.

Hysri Peqani, i njohur në popull si Burdushi, është arrestuar dje nga Policia e Kosovës, pas bastisjes në ordinancën ku ai zhvillon veprimtarinë si “mjek popullor”.

Media mëson se gjatë kohës kur ka shkuar policia në vend të ngjarjes, aty janë parë disa pacientë që ishin drejtuar te mjeku popullor.

Policia e prokuroria gjatë kësaj bastisje kanë siguruar prova të reja, si dhe kanë sekuestruar para e vetura.

Ndryshe, Prokuroria Themelore e Prizrenit kishte ngritur aktakuzë ndaj Burdushit në nëntor të vitit të kaluar.

Sipas aktakuzës së Prokurorisë, Burdushi akuzohet se nga data 20.06.2014 deri më 12.08.2014 në Prizren, duke i fshehur faktet dhe me qëllim të përfitimit të kundërligjshëm të dobisë pasurore për vete apo për personin tjetër ose për t’i shkaktuar dëm material personit tjetër, e mashtron apo vazhdon lajthimin e personit tjetër dhe me këtë rast të dëmtuarin.

Në këtë proces, merren vesh mes vete që i akuzuari Hysni Peqani – Burdushi, t’ia shërojë një anëtar të familjes që vuante nga depresioni, në kompensim të një shume prej 2 mijë eurosh, por që pas kalimit të një kohe pacienti nuk ka shfaqur shenja shërimi, dhe si rrjedhojë këtu i akuzuari Burdushi, të dëmtuarin e vë në lajthitje dhe mashtrim, duke i shkaktuar dëm material.

Me këtë, sipas aktakuzës, i njëjti ka kryer veprën penale të mashtrimit.

(Kosova Sot Online)