“Lekët ose të thera!” Arrestohet shqiptari që kërcënoi me thikë biznesmenin
Policia e Korçës ka bërë me dije se ka vënë në pranga këtë të hënë një 37 vjeçar të dënuar më parë për vrasje, i cili kishte kërcënuar me një thikë një biznesmen.
Shtetasi me inicialet E.L, ka kërcënuar biznesmenin duke i drejtuar thikën. Ai i ka kërkuar në këmbim të jetës së tij një shumë prej 5 mijë eurosh.
Korçë
Goditet një rast në fushën e gjobëvënies.
Kanos me thikë një biznesmen, duke i kërkuar në këmbim të jetës shumën prej 5000 Euro.
Policia ndalon autorin e dyshuar të ngjarjes.
Autori me rrezikshmëri të lartë shoqërore, i dënuar më parë për veprën penale “Vrasja me paramendim”.
Specialistët e Seksionit për Hetimin e Krimeve të Rënda në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë, bënë ndalimin me iniciativë të shtetasit:
E.L, 37 vjeç, banues në Korçë (i dënuar më parë për veprën penale “Vrasja me paramendim”).
Ndalimi i tij u bë pasi, dyshohet se ky shtetas ka kanosur me thikë, një biznesmen në qytetin e Korçës, duke i kërkuar në këmbim të jetës shumën prej 5000 Euro.
Nga tërësia e veprimeve të kryera shtetasi i lartpërmendur, ka konsumuar elementët e veprës penale “Shtrëngimi me anë të kanosjes ose dhunës për dhënien e pasurisë”.
Materialet i kaluan Prokurorisë pranë Gjykatës së Shkallës së Parë Korçë për veprime të mëtejshme hetimore në ngarkim të këtij shtetasi.
(Kosova Sot Online)