“Gjithë kemi me t’kujtu si njeri t’mirë”, Reagimi i shokëve për vrasjen e grabitësit në Shtime

Shokët e Fehmi Gashit, grabitësit që mbeti i vdekur pasi u sulmua nga pronari i një shtëpie në Shtime, kanë thënë se gjithmonë do t’a kujtojnë atë si njeri të mirë.

Driton Gusia, miku i Fehmi Gashit është shprehur se i gjithë rrethi e kanë njohur Fehmiun si njeri të mirë. Ai ka thënë se të gjithë e kanë njohur atë si njeri të ndershëm që nuk është marr me kërcënime.

“… ky njeri u kon i respektum dhe i ka pas raportet e mira në rrethin e tij”, ka shkruar Gusia në Facebook.

Mes tjerash ai është shprehur i nervozuar me komentet, siç i quan ai linçuese të shoqërisë tonë.

“Shumë individë pe festojnë vdekjen e tij edhe përkrahin ide se ai meritoi me vdek ashtu qysh u vra… tu tentu me ik, tu bërtitë për ndihmë, i lëndum, tu humb gjak i therët… ishte i paarmatosur kur vëllezërit Ndereçaj ju flugën me stupca, edhe e rrahën njerin e pafuqishëm teksa veç mundohej me ik, por nuk ditën me u ndal, si duket e shijuan torturën shumë deri i doli shpirti ashtu në skaj t’rrugës… kur thjesht veç kan mujt me e kursy dhe me ja lon n’dorë policisë”, ka shkruar ai.

“A o ma keq mu kon hajn sesa vrasës?! E kuptoj se familjaret duhet mu vetëmbrojt, s’ki çka aty, por a nuk mendon se ne si njerz jemi te evolum boll qe me mujt me e kontrollu veten dhe mu ndal kur nuk ka mo kercnim prej ni njerit te plagosun qe po jep shpirt? Apo jemi aq monstruma saqe nuk mundem mu ndal edhe masi tjetri mbetet trup pa jetë?”, shkroi ai.

Gusia ka thënë se nuk e di përse i ndjeri është përfshirë në krim të organizuar.Por, ajo çka di është se gjithmonë do ta kujtojnë si njeri të mirë.

Gusia ka bërë të ditur se Fehmiu prapa ka lënë gruan dhe dy fëmijë.

Në anën tjetër, Glauk Tahiri, ka thënë se Fehmiu ishte i pa armatosur andaj edhe u rrah e u therr me thikë për vdekje. Tutje ai ka shkruar se Fehmiu ishte i varfër, baba i një fëmije me autizëm duke thënë se edhe në këso mënyra ka tentuar t’a ushqej fëmiun e tij. Ai madje ka kërkuar që vrasësi i tij të vihet para drejtësisë.

“…Mediat e keqpërdoren dhe po e normalizojnë vrasjen e tij, kurse qytetarët, të frustruar me gjendjen ku krimi dhe hajnia e larte na ka sjelle, nuk po e shohin sa e poshtme dhe e poshtër është kjo vrasje”, ka shkruar ai në Facebook.

Ditë më parë, Fehmi Gashi u vra në Shtime pasi u sulmua nga pronari i një shtëpie në Shtime, ku dyshohet se kishte kryer një grabitje së bashku me tre persona të tjerë të mërkurën.

Teksa, Prokuroria ka kërkuar një muaj paraburgim për dy vëllezërit Nrecaj, që dyshohet se mbytën njërin prej katër grabitësve që u kishin hyrë në shtëpi, për t’ua marrë më shumë se 20 mijë franga.

(Kosova Sot Online)